ژ پێخەمەت پتر خزمەتکرنا قوتابیێن خۆشتڤی و زێدەتر ڕێکخستنا کارێن خزمەتگوزاری دناڤ کەمپا زانکۆیێ دا، ڕۆژا دووشەمبێ، ڕێکەفتی (٢٠٢٦/١٠/١٩)، ڕێزدار (پ.د. محمد حسن خمو)، هاریکارێ سەرۆکێ زانکۆیێ بۆ کاروبارێن کارگێری و دارایی، ل سەرۆکاتییا زانکۆیێ کۆمبوونەکا گرنگ ئەنجامدا.
د ڤێ کۆمبوونێ دا، هەر ئێك ژبەرێزان (د. مێهڤان فهمی سامی) ڕێڤەبەرێ بەشێ تەندروستی و سەلامەتی، ڕێڤەبەرا بەشێ یاسایی ل زانکۆیێ ئامادە بوون، و دگەل خودانێن کافیتیریا و خارنگەهـ و نڤیسینگەهێن فۆتۆکۆپیان یێن دناڤا کەمپا زانکۆیێ دا کۆمبوون.
د کۆمبوونێ دا، چەندین تەوەر و بابەتێن گرنگ یێن پەیوەندیدار ب ڕەوشا خزمەتگوزارییێن ناڤخۆیی هاتنە گەنگەشەکرن، و جەخت ل سەر خالێن ل خوارێ هاتە کرن:
• نرخ و بهایێن گونجای: پێداگری ل سەر وێ چەندێ هاتە کرن کو بهایێن خارن و ڤەخارنان د گونجای بن و ب ڕەنگەکێ وەکی بازارێ دەرڤە یان بێ بارگرانی بن، ژ بۆ هندێ کو چ بارگرانیا دارایی ل سەر ملێن قوتابیان دروست نەبیت.
• پاکژیا گشتی و ساخلەمی: پێشخستنا پاکژیا جهـ، ئامیر و کارمەندان ل پێشیا هەمی کاران بهێتە دەینان، وەک مەرجەکێ سەرەکی بۆ پاراستنا ساخلەمییا گشتییا قوتابییان.
• پابەندبوون ب ڕێنمایان: گرنگیدانا تەمام ب ڕێنمایێن یاسایی و ساخلەمی یێن زانکۆیێ، ژ پێخەمەت بلندکرنا ئاستێ خزمەتگوزارییان و ڕێکخستنەکا باشتر.
د پێنگاڤەکا نوی دا بۆ چاڤدێری و پێشنیارێن قوتابییان
ل دوماهییا کۆمبوونێ، وەک ڕێکارەکا سەردەمیانە و بۆ ساناهیکرنا پەیوەندیێ د ناڤبەرا قوتابییان و لایەنێن پەیوەندیدار دا، بارکۆدەک (QR Code) ژلایێ بەشێ تەندروستی و سەلامەتی ڤە هاتیە دروستکرن. ئەڤ بارکۆدە دێ بۆ وێ چەندێ بیت کو قوتابی بشێن ب ڕەنگەکێ ڕێکوپێک گازندە، ڕەخنە و پێشنیارێن خۆ لسەر ئاستێ خزمەتگوزارییا کافیتیریا و خارنگەهان پێشکێش بکەن.